ஈரானுக்கு எதிராக அமுல்படுத்தப்பட்டுள்ள கடற்படை முற்றுகையை காலவரையின்றி தொடரும் திறன் அமெரிக்க இராணுவத்திடம் இருப்பதாக அமெரிக்க பாதுகாப்புத்துறை அமைச்சர் பீட் ஹெக்செத் தெரிவித்துள்ளார். பிராந்தியத்தில் அமெரிக்க கடற்படைக் கப்பல்களை மாறி மாறி நிலைநிறுத்துவதன் மூலம் முற்றுகையைத் தொடர முடியும் என அவர் குறிப்பிட்டுள்ளார்.
இதனிடையே, அமெரிக்க கருவூலச் செயலாளர் ஸ்கொட் பெசென்ட், ஈரான் மீது மேலும் பொருளாதார அழுத்தங்கள் மற்றும் புதிய தடைகள் விதிக்கப்படலாம் என தெரிவித்துள்ளார்.
அதேவேளை, ஹோர்முஸ் நீரிணை வழியாகச் செல்லும் கப்பல் போக்குவரத்து குறிப்பிடத்தக்க அளவில் குறைந்துள்ளது. ஆகஸ்ட் மாதத்தின் சராசரியுடன் ஒப்பிடுகையில், வியாழக்கிழமை சரக்கு கப்பல்களின் எண்ணிக்கை குறைந்திருந்ததாக Kpler தரவுகளை மேற்கோள்காட்டி Reuters தெரிவித்துள்ளது.
இதனால் மத்திய கிழக்கிலிருந்து உலக சந்தைகளுக்கு செல்லும் மசகு எண்ணெய் விநியோகத்தில் பாதிப்பு ஏற்படக்கூடும் என்ற அச்சம் அதிகரித்துள்ளது. இதன் தாக்கமாக ஆகஸ்ட் 14ஆம் தேதி எண்ணெய் விலைகள் உயர்வை பதிவு செய்தன.
எனினும், எண்ணெய் விலை தொடர்ந்து ஒரே திசையில் உயர்ந்து வருகிறது என்று கூற முடியாது. முந்தைய நாளில் உலகளாவிய தேவை குறித்த கவலைகள் மற்றும் அமெரிக்காவின் அதிகரித்த எண்ணெய் கையிருப்பு காரணமாக Brent crude விலை 2 சதவீதத்திற்கும் அதிகமாக சரிந்திருந்தது. எனவே, தற்போதைய சந்தை நிலை புவிசார் அரசியல் பதற்றம் மற்றும் உலகளாவிய தேவை குறித்த கவலை ஆகிய இரண்டினாலும் பாதிக்கப்படுகிறது.
